ولایتي خبرونه:(پکتیا، ننګرهار، پروان) د پکتیا ولایت په زندان کې د (۱۶۰) کیلو واټه ترانسفرمر نصب او ګټې اخیستنې ته وسپارل شو
یاد ترانسفرمر د زندانونو چارو د سمون ادارې په مالي لګښت او د نوموړي ولایت د برېښنا ریاست په همکارۍ په بریالیتوب سره نصب او ګټې اخیستنې ته وسپارل شو.
د پکتیا ولایت د زندان رئیس محترم قاري عبدالغني "عادل" په خبره، یاده پروژه د زندان د ادارې، امنیتي سیستم او نورو اړینو برخو لپاره یو مهم ګام وباله او زیاته کړه، یاد ترانسفرمر نصب سره د برېښنا ستونزه هواره او اړوند خدمات به لا مؤثر او معیاري شي.
همدارنګه د دې ادارې استازي محترم قاري رحیم الله مدني چې د تخنیکي چارو د حل په موخه پکتیا ولایت ته سفر کړی و، وویل؛ په ټولو زندانونو کې د زندانیانو د اسانتیاوو لپاره د رهبرۍ لخوا د تخنیکي چارو تر ارزولو وروسته په بېړنۍ توګه ورته رسېدنه کیږي.
ننګرهار:
د ننګرهار ولایت د زندان سره د یونیسف موسسې له لورې د ژمنیو او اړتیا وړ توکو مرسته وشوه
د زندانونو چارو د سمون ادارې د اقتصادي برنامو او ستراتېژیکو اړیکو مسوولینو په هڅو او د یونیسف موسسې په همکارۍ، شوې مرسته کې چې کمپلې، جرابې، څادر، دستکشې او بوټان شامل ول، د دې ولایت د ماشومانو د اصلاح او روزنې مرکز پر محجوزینو په شفافه توګه وویشل شول.
د ننګرهار ولایت د زندان رئیس محترم مولوي سهیل "سعید" د یادې موسسې له همېشنیو مرستو او همکاریو څخه د خوښۍ د څرګندولو ترڅنګ، وویل چې د ماشومانو ساتنه، پالنه او روزنه زمونږ انساني او اخلاقي مسوولیت دی او هڅه کوو څو مرستې را جلب او هغوی ته لا زیاتې اسانتیاوې برابري کړو.
پروان:
د پروان ولایت د زندان رئیس په مشرۍ پلاوي د یاد ولایت د کوه صافي ولسوالۍ له توقیفخونې څخه لیدنه وکړله
د پروان ولایت د زندان رئیس محترم مولوي محمد ابراهیم "حقاني" په مشرۍ پلاوي د دې ولایت د کوه صافي ولسوالۍ د توقیفخونې څخه د ليدنې ترڅنګ، له مسوولینو سره پر اړوندو چارو خبرې وکړې.
داراز، پلاوي د نوموړي زندان له توقیفیانو سره په لیدنه کې د هغوی ستونزې او روا غوښتنې ترې له نږدې واورېدې او د حل په موخه یې ورته ډاډ ورکړ.
همدا راز، نوموړي پلاوي د یادې توقیفخونې له مسوولینو سره په لیدنه کې د هغوی ښه خدمتونه وستایل او توقیفیانو سره پر ښه چلند یې ټینګار وکړ.
رجب المرجب ۸/ ۱۴۴۷
د مقام د دفتر ریاست
د اطلاعاتو او عامه اړیکو امریت
