ولایتي خبرونه:( پکتیا، فاریاب، هرات) د پکتیا ولایت په زندان کې ( ۳۹) تنه زندانیان د کمپیوټر او حرفوي زده کړو څخه فارغ شول

په دې اړه جوړه شویو مراسمو کې، چې د پکتیا د زندان رئیس محترم قاري عبدالغني "عادل" او یو شمېر سیمه ییزو مسوولینو او علماوو ګډون درلود، له یادو زده کړو څخه د نوموړو زندانیانو فراغتغونډې ته د خپلو خبرو پرمهال د دوی د فراغت مبارکي وویله او زیاته یې کړله، چې زندانیانو لپاره د زده کړو ښه زمینه برابره شوې نو لازمه ده چې خپل وخت بې ځایه تېر نه کړي او د دغه طلايي وخت څخه ګټه پورته کړي.

دغه برنامه د نوموړي ولایت د زندان د تخنیکي او مسلکي زده کړو امریت په همکارۍ او د یاد ولایت د کار او ټولنیزو چارو ریاست په همغږۍ په لاره اچول شوې وه چې (۲۲) تنه د کامپیوټر د هارډ او سافټ ویر او (۱۷) تنه نور د ترکاڼۍ برخې څخه فارغ شول.

فاریاب:

د زندانونو چارو د سمون ادارې د رهبرۍ د پرېکړې پربنسټ او اړتیا ته په کتو د فاریاب ولایت زندان لپاره نوی نظامي مدیر وټاکل شو.

د بلخ ولایت د زندان رئیس محترم مولوي کمال الدین "زاهد" چې نوموړي ولایت ته یې رسمي سفر درلود، د فاریاب ولایت د زندان د مسوولینو په حضور کې یې د جوړو شویو مراسمو پرمهال محترم محمد جان "حیدري" چې مخکې د سرپل د زندان نظامي مدیر و تبدیل او د فاریاب زندان د نظامي مدیر په توګه، د یاد زندان پرسونل ته وروپېژندل شو او له هغوی غوښتنه وشوه، چې له نوي مدیر سره د کار په برخه کې بشپړه همکاري او همغږي ولري.

د دغو مراسمو په پای کې، نوي ګومارل شوي مدیر هم ژمنه وکړله، چې ورسپارل شوي مسوولیتونه به په رېښتینولۍ او امانتدارۍ ترسره، د خپلو مشرانو لارښوونې به په بشپړ ډول عملي او د مربوطه زندان د امنیتي او نظامي چارو د لا ښه والي لپاره به ډېرې هڅې وکړي.

هرات:

د زندانونو چارو د سمون ادارې د اقتصادي برنامو او ستراتېژیکو اړیکو ریاست په هڅو او د سره صلیب نړۍ والې کمېټې په همکارۍ د یاد ولایت د زندانیانو سره شاوخوا (۳۰۰) کمپلو مرسته وشوه.

د هرات ولایت د زندان مسوولینو د یادې موسسې له همېشنیو مرستو او همکاریو څخه د خوښۍ د څرګندولو ترڅنګ، په دې ساړه موسم کې دغه مرستې اړینې وبللې.

جمادي الثاني ۱۸/ ۱۴۴۷

د مقام د دفتر ریاست

د اطلاعاتو او عامه اړیکو امریت