د زندانونو چارو د سمون ادارې عمومي رئیس په کابل کې د یوناما دفتر له مشرې سره تودیعي ناسته ترسره کړله
د زندانونو چارو د سمون ادارې عمومي رئیس محترم الحاج مولوي محمد یوسف "مستري" په داسې حال کې چې د دې ادارې یو شمېر رئیسانو او مسوولینو هم شتون درلود، د افغانستان لپاره د یوناما له مشرې مېرمن روزا اوتنبایوا او مل پلاوي سره په خپل کاري دفتر کې ولیدل.
په دې لیدنه کې، دواړو لورو د زندانیانو د وضعیت، هغوی د حقونو خوندیتوب، اصلاح او روزنیزو پروګرامونو او نړیوالو همکاریو د دوام په اړه خبرې اترې وکړې.
د زندانونو چارو د سمون ادارې عمومي رئیس محترم الحاج مولوي محمدیوسف "مستري" د مېرمن اوتنبایوا په مشرۍ پلاوي ته د ښه راغلاست ویلو ترڅنګ په افغانستان کې د هغې ماموریت بریالی یاد کړ او زیاته کړله چې نوموړې په خپل درې کلن ماموریت کې د زندانونو چارو سمون سره په بیلابیلو برخو کې همکاري کړې.
محترم الحاج مولوي محمدیوسف مستري د یوناما مشرې میرمن روزا اوتنبایوا او د هغې کاري ټیم څخه د مننې ترڅنګ وویل « سره د دې چې د یوناما د دفتر او نور مرستندویه همکار بنسټونه د زندانونو چارو د سمون ادارې مربوط د مرکز او ولایتونو زندانونو سره په بېلابېلو برخو کې همکاري لري، خو موږ هیله لرو چې د مرستو دا لړۍ لا نوره هم وغځېږي او دوام ومومي».
داراز، په افغانستان کې د ملګرو ملتونو ځانګړې استازې مېرمن روزا اوتنبایوا په کونړ کې د وروستۍ زلزلې قربانیانو په اړه د خواخوږۍ او غمشریکۍ مراتب وړاندې کړل.
همداراز، میرمن اوتنبایوا زندانیانو ته د ښو خدمتونو وړاندې کولو او د هغوی حقونو په خوندي کولو کې د زندانونو چارو د سمون ادارې هڅې وستایلې او ډاډ یې ورکړ چې یوناما به د تیر په څیر نوموړې ادارې سره خپلو مرستو او همکاریو ته دوام ورکوي.
د افغانستان لپاره د یوناما دفتر مشرې مېرمن روزا اوتنبایوا د زندانونو چارو د سمون ادارې له رهبرۍ څخه د خوښۍ په څرګندولو وویل، دې ادارې تل نړۍوالو همکارو بنسټونو ته له زندانونو څخه د کتنې او ارزونې زمینه برابرې کړې او له نېکه مرغه نوموړو بنسټونو هم د زندانیانو وضعیت له نږدې ارزولې او ډاډمن شوي دي، نوموړې د زندانونو چارو د سمون ادارې مسوولینو ته ډاډ ورکړ چې زندانیانو ته ترسره شوي خدمتونه به نړیوالو سازمانونو او رسنیو سره شریک کړي.
ربیع الاول ۱۵/ ۱۴۴۷
د مقام د دفتر ریاست
د اطلاعاتو او عامه اړیکو امریت
