د زندانونو چارو د سمون ادارې د پالېسۍ او مسلکي چارو مرستیال په مشرۍ یوه پلاوي د لوګر ولایت د زندان ارزونه وکړله
محترم الحاج محمدکاظم "طارق" په داسې حال کې، چې د یادې ادارې یو شمېر مسوولینو یي هم ملتیا کوله، د لوګر ولایت د زندان له مسوولینو سره په اړوندو مسایلو خبرې وکړې.
همداشان، د ادارې د پالېسۍ او مسلکي چارو مرستیال محترم الحاج محمدکاظم طارق په مشرۍ پلاوي دغه زندان د بېلابیلو برخو څخه د لیدنې ترڅنګ يې د زندانیانو سره په کتنه کې د هغوی د حال او د محبس د وضعیت په اړه پوښتنه وکړله، چې د هغوی له لورې ورته د رضایت په څرګندولو سره ډاډ ورکړل شو.
همداراز، زندانیانو یو لړ غوښتنې لرلې، چې د پلاوي له لورې ورته د حل ډاډ ورکړل شو.
په ورته وخت کې، محترم الحاج محمد کاظم طارق وویل: « تاسو زندانیان نه، بلکه موږ ته د کورنیو امانت یاست، خو هیله مو دا ده چې په زندان کې دیني ، سواد او کسب زده کړو له شته فرصته په استفادې د خپل وخت له بې ځایه ضایع کېدو څخه د مخنیوي په موخه خپل ځان اصلاح او له بند څخه تر ازادېدو وروسته د ګټورو وګړو په توګه خپلې کورنۍ او ټولنې سره یو ځای شئ ».
د پالېسۍ او مسلکي چارو مرستیال په مشرۍ پلاوي د نوموړي ولایت د زندان د پخلنځي څخه هم لیدنه وکړله او اړوندو مسوولینو ته یې لارښوونې وکړې، چې د پخلنځي نظافت او پاکۍ ته جدي پاملرنه وکړي.
د دې لیدنې په پای کې، د زندانونو چارو د سمون ادارې د پالېسۍ او مسلکي چارو مرستیال محترم الحاج محمدکاظم "طارق" په مشرۍ پلاوي د لوګر ولایت د زندان د مسوولینو او مؤظفینو هڅې او خدمتونه وستایل او ورته یې د لاښه کېدو په موخه لازمې لارښوونې وکړې.
صفر المظفر ۹/ ۱۴۴۷
د مقام د دفتر ریاست
د اطلاعاتو او عامه اړیکو امریت
