په افغانستان کې د ملګرو ملتونو د مرستندویه ادارې یا یونیسف، د زندانونو چارو د سمون ادارې د اصلاح او روزنې له مرکزونو سره په بېلابېلو برخو کې د مرستو ژمنه وکړه
د زندانونو چارو د سمون ادارې د مقام د دفتر رئیس محترم عبیدالله "اخلاص"، د اقتصادي برنامو او ستراتېژيکو اړیکو رئیس محترم ډاکټر سیداحمد "اسحاقزي" او د ادارې د روغتیا رئیس محترم مولوي عبداللطیف "سجاد" په ګډون یوه پلاوي نن (چهارشنبې) په افغانستان کې د ملګرو ملتونو د مرستندویه ادارې یا یونیسف د ماشومانو د خوندیتوب برخې متخصصینو هر یو محترم میري، محترم یووي او محترم سمیع "هاشمي" په شمول پلاوي سره په خپل کاري دفتر کې وکتل.
د یادې کتنې پرمهال دواړو لوریو، د هېواد د اصلاح او روزنې مرکزونو د محجوزینو د روغتیا، ښوونې او روزنې او د هغوی د حقونو د خوندیتوب په اړه خبرې اترې وکړې، چې د زندانونو چارو د سمون ادارې د پلاوي له خوا په نوموړو برخو کې د خپلو ترسره کړیو فعالیتونو د معلوماتو ورکولو ترڅنګ، د یونیسف د مرستو او په ګډه د همکارۍ غوښتنه وشوه.
په ورته وخت کې، د یونیسف د دفتر پلاوي په نوموړو مرکزونو کې له محجوزینو سره تر خپلې وسې پورې د اړتیا وړ توکو د برابرولو ترڅنګ، په نږدې راتلونکي کې د اصلاح او روزنې د مرکزونو د کارکونکو لپاره د ماشومانو د حقونو د رعایتولو په اړه د سیمینارونو د جوړولو او
د کابل ولایت د ماشومانو د اصلاح او روزنې د مرکز د تعمیر د ځینو برخو د ترميم او رنګمالي کولو ژمنه وکړه.
داراز، د زندانونو چارو د سمون ادارې پلاوي د یونیسف د پلاوي له خوا پر یادو ژمنو خوښي وښوده او زیاته یې کړه چې دوی به هم له خپله اړخه د یونیسف دفتر اړوندو کارکوونکو او مسوولینو ته د ماشومانو د اصلاح او روزنې په مرکزونو کې د نوموړو ژمنو د عملي کولو لپاره لازمې همغږۍ او اسانتیاوې برابرې کړي.
شوال المکرم ۱۵/ ۱۴۴۵
د مقام د دفتر ریاست
