د ننګرهار ولایت په زندان کې ١١٠ تنو محبوسینو د قرانکریم د تجوید دوره پایته ورسوله
د دغه زندان مسوولین وايي، زندانیانو ته د دیني زده کړو د برنامو او د قرانکریم د تکړه او ماهرو استادانو د هڅو پرمټ، د دې زندان د دیني مدرسې څخه ۱۰۶ تنه محبوسینو د تجوید او څلور تنو نورو د حفظ دوره پایته ورسوله.
د یادو مسوولینو د معلوماتو پربنسټ، د نوموړو محبوسینو د فراغت او دستاربندۍ لپاره په زندان کې دننه یولړ پرتمین مراسم جوړ شوي وو، چې په کې د ننګرهار ولایت یو شمېر ملکي او نظامي مسوولینو او ديني عالمانو ګډون کړی وو.
په ورته وخت کې، د مراسمو ویناوالو دې ۱۱۰ تنو محبوسینو قاریانو ته د فراغت مبارکي وویله او دا یې د هغوی لپاره د الله پاک (ج) له خوا یو لوی نعمت او رحمت یاد کړ.
داراز، ویناوالو د قرانکریم او په تجوید د هغه د تلاوت د اهمیت او ثواب په اړه خبرې وکړې او په تجویدي بڼه د قرانکریم تلاوت یې د ټولو مسلمانانو لپاره اړین وګڼه.
د نوموړو مراسمو په پای کې، د ننګرهار ولایت په زندان کې د قرانکریم د تجوید او ناظرې د دورې یاد شمېر فارغو شویو محبوسینو ته د اعزاز پګړۍ پر سر او د خیر دعا ورته وشوه.
شعبان المعظم ۹/ ۱۴۴۵
د مقام د دفتر ریاست
د اطلاعاتو او عامه اړیکو امریت
