د افغانستان د اولمپیک ملي کمېټې د کابل ولایت له مرکزي توقیفخونې سره د یو اندازه ورزشي توکو مرسته وکړه

په دغو توکو کې چې د کرېکټ او فوټبال لوبو اړوند ځینې وسایل او جامې شاملې وې، نن(شنبې) د یو لړ مراسمو په ترڅ کې د زندانونو چارو د سمون ادارې د نظامي چارو مرستیال محترم لوی پاسوال قاري حبیب الله "بدر" او د نوموړې کمېټې اجراییه رئیس محترم دادمحمد پاینده "اختري" له خوا په داسې حال کې، چې د یادې ادارې د مالي او حسابي رئیس محترم مشعل "حکمت"، د پخوانیو مجاهدینو بندیانو د ریاست رئیس محترم ملا محمدنور "بلال شاهین"، د کابل ولایت د مرکزي توقیفخونې مرستیال محترم قاري ذاکر، د افغانستان د بوکسنګ ملي فډراسیون رئیس محترم محمدقدیر "سلطاني"، د دې فډراسیون سر روزونکي محترم معروف "رغبت"، د هنډبال فډراسیون سر روزونکي محترم فریدون "مرزایار" او ځینو نورو مسوولینو هم شتون درلود، د کابل ولایت د مرکزي توقیفخونې د ورزش پر مینه والو توقیفیانو وویشل شول.
محترم لوی پاسوال قاري حبیب الله "بدر" د اولمپیک ملي کمېټې له دې مرستې څخه د مننې ترڅنګ وویل، د زندانونو چارو د سمون ادارې د هېواد په ټولو محبسونو، توقیفخونو او د ماشومانو د اصلاح او روزنې په مرکزونو کې محبوسینو، توقیفیانو او محجوزینو د جسمي او روحي سلامتۍ، سالمې بوختیا او ښې روزنې په موخه د ورزش منظم ډګرونه او ترخپلې وسې د لوبو یو اندازه توکي برابر کړي دي، خو د دې چارې پراختیا او غښتلتیا لپاره د همکارو بنسټونو همکاري ډېره اړینه ده.
داراز، د افغانستان د اولمپیک ملي کمېټې اجراییه رئیس محترم دادمحمد پاینده "اختري" له ورزش سره د یادو توقیفیانو پرلېوالتیا خوښي وښوده او زیاته یې کړه، چې غواړي په راتلونکې کې د زندانیانو د ورزش لپاره نورې مرستې هم وکړي.
په ورته وخت کې، د کابل ولایت د مرکزي توقیفخونې دوو تنو توقیفیانو دوی ته د یادو ورشي توکو د ورسپارلو له امله د خوښۍ په څرګندولو سره وویل، ورزش یې د وخت له بېځایه ضایع کېدو او خپګان څخه د ژغورنې ښه وسیله ده.
د زندانونو چارو د سمون اداره که له یوې خوا د محبوسینو، محجوزینو او توقیفیانو د روغتیا او سلامتیا په موخه د ورزش لپاره لازم امکانات برابروي، له بلې خوا له همکارو ملي او نړیوالو بنسټونو هم په دې برخه کې د هراړخیزو همکاریو او مرستو هیله لري.

جمادي الثاني ۲۳/ ۱۴۴۵
د مقام د دفتر ریاست
د اطلاعاتو او عامه اړیکو امریت