د سمنګان ولایت د زندان لپاره نوي امر په کار پیل وکړ
د زندانونو چارو د سمون ادارې د عمومي رئیس محترم مولوي محمد یوسف "مستري" په مشرۍ او د دې ادارې د مقام د دفتر رئیس محترم عبیدالله "اخلاص" او د کورني تفتیش رئیس محترم مولوي فضل احمد "احمدي" په ګډون یو صلاحیت لرونکی پلاوی سمنګان ته په رسمي سفر ولاړ او هلته یې د یولړ جوړو شویو مراسمو په ترڅ کې د ادارې له اړتیا سره سم محترم ملا محمد سردار "بېګ" چې تر دې مخکې د فاریاب ولایت د زندان رئیس و، د نوي امر په توګه د دې زندان پرسونل ته معرفي کړ او نوموړي هم رسماً خپله دنده پیل کړه.
داراز، محترم مولوي محمدیوسف "مستري" د یادو مراسمو پرمهال خپلو خبرو کې وویل: « افغانستان زموږ او ستاسو ګډ کور دی او په هره برخه او منصب کې چې یوو نو خدمت کول یې پر موږ لازم دی او لکه څنګه چې د زندانونو مسئولیت یو دروند کار دی، نو زندانیانو ته خدمت کول هم لویې حوصلې او زغم ته اړتیا لري او زه ډاډه یم چې د دې ادارې ټول مسوولین ترې برخمن دي».
همداشان، د زندانونو چارو د سمون ادارې عمومي رئیس د سمنګان د زندان د پخواني امر خدمتونه او لاسته راوړنې وستایلې او نوي امر ته یې د دې زندان له پرسونل سره په ګډې همکارۍ او همغږۍ د مسوولیتونو د ښه ترسره کولو سپارښتنه وکړه.
په ورته مهال، د سمنګان ولایت د زندان نوي امر محترم ملا محمد سردار "بېګ" ژمنه وکړه، چې په جدي توګه به د زندانونو چارو د سمون ادارې د رهبرۍ له خوا پر هغه د دې اعتماد او ورسپارل شویو مسوولیتونو ته پاملرنه کوي.
جمادي الثاني-۲۱/ ۱۴۴۵
د مقام د دفتر ریاست
د اطلاعاتو او عامه اړیکو امریت
