ولایتي خبرونه (پنجشېر-بادغیس) د پنجشېر ولایت د زندان د کارکونکو د ظرفیت لوړونې په موخه یو ورځینی سیمینار وړاندې شو
د زندانونو چارو د سمون ادارې د عمومي رئیس محترم مولوي محمدیوسف "مستري" په سپارښتنه او د هېواد زندانونو ته د پاملرنې په لړ کې دا ځل د پنجشېر ولایت د زندان د کارکونکو د ظرفیت لوړونې په هدف یو ورځینی سیمینار د ادارې د تجربه لرونکو ښوونکو له خوا وړاندي شو.
د پنجشېر د زندان مسولینو دا ډول سیمینارونه د کارکونکو د وړتیاوو لوړونې په موخه مهم یادکړل او د زندانونو چارو د سمون له ادارې یې د ورته نورو ګټورو پروګرامونو د پلي کولو غوښتنه کړې.
دا راز، د دغه زندان د مسولینو په وینا، په یاد سیمینار کې یې د دې زندان کارکونکو سره د زندانیانو د ساتنې له هغوی سره د ښه چلند، د بندیانو د انتقال، د هغوی د تسلیمولو طریقه او ورته د غوره اسانتیاوو برابرولو تر څنګ نور د اړتیا وړ مهم موضوعات شریک شول چې په راتلونکي کې به مثبتې پایلې ولري.
د یوبل خبر له مخې، د بادغیس د زندان امر محترم ملا سیدباران"عدالتي" تېره ورځ د دغه ولایت د استیناف محکمې له رئیس محترم مولوي عبدالخالق"امدادالحق" او مل پلاوي سره په خپل کاري دفتر کې ولیدل او د زندانیانو د محاکماتي چارو او دوسیو څېړلو په هکله یې ورسره خبرې اترې وکړې.
داراز، پلاوي د بادغیس زندان له زندانیانو سره هم له نږدې ليدلي د هغوی ستونزې او غوښتنې یې اورېدلي، چې زندانیانو د پلاوي په ورتګ خوښي څرګنده کړه او د خپلو جرمي دوسیو د ژر څېړلو غوښتنه يې ترې وکړه.
په ورته وخت کې، د دې ولایت د استیناف محکمې څخه راغلي پلاوي زندانیانو ته ډاډ ورکړ چې دوی به یې د جرمي دوسیو په برخه کې خپلو چارو ته چټکتیا ورکړي.
ربیع الثاني۶/ ۱۴۴۵
د مقام د دفتر ریاست
د اطلاعاتو او عامه اړیکو امریت
